Hoekom is 'n afrigter en mentor nodig vir my persoonlike en professionele sukses?
Professionele atlete en suksesvolle mense erken en bedank altyd hul rolmodelle en afrigters, maar ook seniors in hulle lewe wat tyd met persoonlike kontak in hulle bele het.Ek onthou atletiek afrigters, onderwysers, geestelike ouers, lektore, professionele afdelingshoofde en bestuurders wat genoeg omgegee het om tyd te maak vir my ontwikkeling. Ek eer hulle vir hulle voorbeeld en tyd as rolmodelle. Wie is jou atletiek en lewensafrigters en rolmodelle wat jou gehelp vorder het tot waar jy vandag is? Het jy hulle al erkening gegee?
Die eerste inspirasie wat my persoonlik aangetrek het na 'n hardloop sportloopbaan was my oudste broer toe hy vertel van hoe hulle op hoerskool veldwedlope met natuurlike hindernisse hardloop. My broer het my op ouderdom 12jr vir my eerste persoonlike afrigting gevat en geleer van middelafstand intervalle spoedwerk.
Skoolafrigters was maar min en by die Bellville atletiekbaan het klubatlete my saamgevat en kon ek ervaar om 'n baan met legendariese kampioen Ewald Bonzet te deel.
Daarna het Chris Kies my eerste skoolafrigter geword en binne 2 jaar tot by WP Kampioenskap se top 4 ontwikkel het met die SA atlete nr.1 en 2 deel van ons kompetisie op skoolligas 800m tot 3000m.
Op universiteit en in die weermag moes ek alleen oefen totdat Pieter Rossouw ons groep jongmanne en later Hans van der Veen my as veteraan atleet tot S.A. kampioenskappe ontwikkel het. As jongman was tannie Martha as 70-jarige pensionaris my geestelike moeder en berader. My goeie vriend en drafmaat Coenie het my rekords en statistieke gehou . Hy het realistiese projeksies gemaak en terugvoer gegee oor my vordering wat selfvertroue gebou en nuwe teikens binne bereik gebring het. My afrigter Pieter, oefenmaats en vriend Coenie het my byvoorbeeld gehelp om my 10km beste tyd van 30min41sek en 68min op 21km te behaal voor ek deur die dokter gestop is en 3 maande moes rus. Op my eie kon ek dit nie doen nie!
Miskien is dit invloed en hulp van persoonlike afrigters en mentors wat jou atletiek, beroepsvordering of persoonlike lewe tot die volgende vlak van vordering kan vat of unieke persoonlike uitdagings gaan help oorkom.
Hulle het my geleer wat hulle weet, gewys wat verwag word, uitgedaag om twyfel te oorkom, aangejaag, aangemoedig en op die regte pad gehou na nuwe doelwitte. Sommiges het saam gehardloop en gewys hoe word dit gedoen.
Soek 'n rolmodel of afrigter in jou sport , persoonlike of beroepsveld en vra hom/haar om jou te help. Vra hulle om hul meerdere kennis, vaardighede, ingesteldheid en ervaring met jou te deel en jou met persoonlike doelwitte te help in gereelde ontmoetings of elektroniese skakeling.
Mense wil graag help en hul ervaring deel, maar ons is te trots om te vra of om persoonlik aanspreeklik gehou te word as ons nie hou by ons ooreengekome doelwitte nie.
Suksesvolle atlete en besigheidsmense begin met ontevredenheid met hul huidige vlak en dan:-
1. stel duidelike korttermyn en langtermyn doelwitte met 'n uitdagende groot einddoel;
2. skryf 'n aksieplan met daaglikse en weeklikse stappe en periodieke mylpale;
3. plaas hul program en prentjie van einddoel sigbaar op teen muur vir daaglikse herinnering.
4. kry 'n vriend, groepie of afrigter om hul vordering te help meet en verantwoording te doen en te help vorder as verskonings maklik kom.
5. meet gereeld hul vordering, maak aanpassings en vier met vreugde hul suksesse.
Jou afrigter sal jou help volgens julle ooreenkoms om:-
1. 'n persoonlike program op te stel met weeklikse roetines wat hy self hou of uitgee;
2. 'n oefenplan met tydtoetse en wedlope vir meting van vordering;
3. jou stop as jy te veel, te hard of verkeerd oefen of verhoed om te oefen as jy te siek of beseer is;
4. wys wat gedoen moet word, reghelp, aanjaag, moed in praat as jy sukkel of teleurstellings het, maar nooit afkraak nie.
5. 'n goeie afrigter luister na sy atlete, leer jou ken, verstaan jou sterk en swak punte en
6. maak met jou planne om die beste te bereik injou sport of groter persoonlike prentjie as gebalanseerde mens met goeie waardes en prioriteite.
'n Goeie afrigter sal jou verwys as hy/sy nie verder 'n verskil kan maak nie of as jy op 'n nuwe vlak meer gevorderde of aanvullende hulp en afrigting benodig.
Goeie vriende en afrigters het my gedruk toe ek oor my vordering getwyfel het, aangemoedig toe ek wou opgee, gestop toe ek kop verloor het met te veel wedlope en gevaarlike besluite wat skadelik sou wees.
As jy 'n jong of onervare atleet is, het jy die hulp van 'n afrigter of ervare vriend nodig veral as jy groot doelwitte en sterk ambisie het om goeie en vinnige resultate te sien.
Deelname aan wedlope oor intense lang afstande of middel afstande vir jong atlete kan intense liggaamlike en psigiese eise stel. Eise wat gereelde monitoring vereis om onnodige risiko's van skadelikke uitbranding en beserings te voorkom met moontlike langtermyn skade en moedeloosheid. Lees meer hieroor in vorige artikels. Ek het verskeie jong en onervare atlete gesien wat die hartseer pad gestap het, omdat hulle nie afrigters gehad het of nie goeie raad wou aanvaar nie.
Afrigters staan op die kantlyn en kan die groter prentjie met objektiwieit beoordeel gebaseer op feite en minder emosie as die twyfelagtige oordeel van die deelnemende atleet self.
Afrigters is beskikbaar by atletieklubs, by atletiekbane, op die internet , met elektroniese afrigting en per selfoon as persoonlike kontak nie moontlik is nie.
Ek beplan om op 'n elektroniese platform persoonlike afrigting aan belangstellende atlete te gee wat my meer dikwels vra om hulp.
Kafdraf groete
Please support the blog by making donations.
